ပန်းကလေးမှ So What!? ဆိုတဲ့ ကမ်ပိန်းကို အပြည်ပြည်ဆိုင်ရာအမျိုးသမီးများနေ့ဖြစ်တဲ့ ၂၀၁၉ ခုနှစ် မတ်လ ၈ ရက်နေ့မှာ ဖေ့ဘုတ် စာမျက်နှာတစ်ခု အနေနဲ့ စတင်မိတ်ဆက်ခဲ့ပါတယ်။ မိတ်ဆက်ပွဲမှာလည်း နာမည်ကြီးအနုပညာရှင်များ နဲ့ သက်ဆိုင်ရာခေါင်းဆောင်များ၊ နိုင်ငံခြား သံရုံးများမှ တာဝန်ရှိသူများ၊ ဖွံ့ဖြိုးတိုးတက်ရေးအဖွဲ့ အသီးသီးမှ ကိုယ်စားလှယ်များ တက်ရောက်ခဲ့ပါတယ်။

မြန်မာနိုင်ငံရှိ မြို့ပြနှင့် မြို့ပြဝန်းကျင်နေထိုင်သူလူငယ်များ၏ ဓမ္မတာလာခြင်းနှင့်ဆိုင်သော အယူမှားများ အရိုးစွဲအယူသီးမှုများအား ဒီကမ်ပိန်းမှတစ်ဆင့် ပြောင်းလဲရန်ရည်ရွယ်ပါတယ်။

ကမ်ပိန်းကို မိတ်ဆက်ပြီးမကြာခင်မှာပဲ ဓမ္မတာကျန်းမာရေးနှင့် လူမှုဆက်ဆံရေးဆိုတဲ့ ရှုထောင့်မှ ကျန်းမာရေးဆိုင်ရာ ပညာရှင်များနှင့်အတူ နာမည်ကြီးအနုပညာရှင်များ မျက်နှာစုံညီဆွေးနွေး ထားတဲ့ ဗီဒီများကို ဖေ့ဘုတ်စာမျက်နှာမှ တစ်ဆင့် မျှဝေထားပါတယ်။

ပညာပေးနှင့် စိတ်ခွန်အားမြှင့်တင်ရေး အကြောင်းအရာများကို တစ်ပတ်လျှင် နှစ်ကြိမ်နှုန်းဖြင့် မျှဝေပေးနေပြီး Messenger မှလည်း မေးခွန်းများ၊ အကြံပြုချက်များကိုလည်း တုံ့ပြန်ဖြေကြားပေးလျက်ရှိပါတယ်။

ဒီကမ်ပိန်းရဲ့ အဓိကလုပ်ငန်းစဉ်ကတော့ ဓမ္မတာလာခြင်းဆိုင်ရာ အရေးကြီးတဲ့ ပညာပေးလုပ်ငန်းတွေကို တိုးချဲ့ဆောင်ရွက်ပေးဖို့ပါပဲ။ ဒါမှသာလူငယ်တွေအနေနဲ့ ဓမ္မတာလာခြင်းဟာ အမျိုးသမီးဘဝရဲ့ သဘာဝဖြစ်စဉ်ဆိုတာနားလည်ပြီး အမျိုးသမီးများအနေနဲ့လည်း ရှက်ကြောက်စရာမလိုဘဲ ဂုဏ်ယူနိုင်၊ အမျိုးသားများကလည်း ကိုယ်ချင်းစာပြီး အားပေးနိုင်မှာပါ။